Amarushanwa ya Umurenge Kagame Cup (UKC 2026) yaberaga mu karere ka Bugesera yarangiye uyu munsi , yerekana ubudasa mu mikino itandukanye. Umukino wa Sitball mu bagabo, Gasabo District yegukanye igikombe itsinze Kirehe District, naho mu bagore igikombe cyatwawe na Kirehe District itsinze Rulindo District mu mukino wa nyuma. Uretse Sitball, aya marushanwa yagaragaje imikino gakondo ikundwa n’Abanyarwanda nka gusimbuka urukiramende ndetse n’ikibuguzo/igisoro, imikino ifasha mu kubaka ubufatanye, kwihangana no gukomeza indangagaciro z’umuco nyarwanda. Hanagaragayemo kandi imikino yo gusiganwa ku magare, Volleyball na Basketball, bigaragaza ko UKC 2026 ari amarushanwa y’uburyo bwagutse ahuza siporo rusange, iy’abafite ubumuga n’imikino gakondo.